CONG. NOGRALES, NAGPAPAKITA NG TUNAY NA KULAY NA ANTI-MANGGAGAWA

BINATIKOS ng militanteng Kilusang Mayo Uno (KMU) ngayong umaga si Majority Floorleader Cong. Prospero Nograles Jr. sa deklarasyon nito na ibabalik ang House Bill 345 sa Committee on Labor and Employment ng Kongreso sa halip na ipapasa na ito sa 3rd and final reading.

Ayon kay Cong. Nograles, hindi na magkakaroon deliberasyon sa 3rd reading ang HB 345 na magbibigay ng staggered na P125 dagdag-sahod sa mga manggagawa dahil sa mga desisyon ng regional wage boards.

Tinuligsa ni Joel Maglunsod, Pangkalahatang-kalihim ng KMU, ang posisyon ni Cong. Nograles na nagpapakita lamang diumano na anti-manggagawa ang mambabatas at hindi sinsero sa pagsusulong ng makabuluhang dagdag na sahod sa mga manggagawa.

“ Matapos ang mababaw na dahilan ni Cong. Nograles na luma na at mabagal ang imprenta ng Kongreso kaya’t hindi na nakapagprinting pa ng mga kopya ng HB 345 sa mga kongresista para sa 3rd reading bago ang recess nila noong Mayo, heto’t may panibagong maniobra na naman siya para maharang ang pagpasa ng panukalang batas. Ang anumang mumong dagdag na sahod at ECOLA pa nga sa ibang rehiyon ay hindi dahilan upang hindi na maipasa ang P125 legislated wage increase. Bilang mambabatas dapat alam niyang magkaiba ito,” sabi ni Maglunsod.

Ipinagdiinan din ni Maglunsod na lubhang napakaliit ng P25 dagdag na sahod na ibinigay ng NCR regional wage board sa mga obrero lalo na’t nagtaasan pa ang presyo ng mga bilihin dahil sa sunud-sunod na bagyong sumalanta sa bansa.