Panagutin si Gloria! Tanggalin si Corona! Noynoy, pahirap sa bayan, labanan!

Usap-usapan ngayon ang paglilitis ng Senado para sa impeachment ni Chief Justice Renato Corona. Kung mahahatulan siyang guilty o maysala rito, matatanggal siya sa pwesto. Ano ang dapat na tindig nating mga manggagawa at mamamayan dito?

Dapat lang ma-impeach si Corona. Gusto kasi nating maparusahan si Gloria Macapagal-Arroyo at mga tuta niya para sa mga grabeng krimen nila. Hindi ba’t ang daming krimen ni Gloria? Bukod sa pandaraya sa eleksyon, nariyan ang pagdambong sa kabang-bayan. Hello Garci at NBN-ZTE. Nariyan ang pagdulot ng matinding kagutuman at kahirapan. Nariyan ang laksang paglabag sa mga karapatang-tao – pagpatay, pagdukot, pagtortyur.

Ang problema, tuta rin ni Gloria si Corona. Hadlang ang punong hukom sa pagpapanagot sa dating pangulo. Paano mapapanagot sa batas si Gloria kung kakampi niya ang ultimong magbibigay ng interpretasyon sa batas? Hindi ba’t minadali ni Corona ang paghadlang ng Korte Suprema sa pagbabawal kay Gloria na umalis ng bansa? Halatang-halata: Kung nasunod ang Korte Suprema, nakatakas na sana si Gloria!

Ang totoo, kontra-mamamayan ang Korte Suprema. Kahit sinong ilagay mo diyan, hindi iyan papanig sa bayan. Pero dapat singilin si Corona sa mga kontra-mamamayang desisyon ng Korte. Pinayagan ang pagpataw ng VAT sa mga toll fee, kaya nagmahal. Kay Danding Cojuangco raw talaga ang coco levy funds, kahit galing sa nakaw ni Marcos. Kinampihan si Lucio Tan kontra sa mga flight attendants at stewards ng PAL.

Pero dapat mapagbantay tayo. Ang gusto natin, mapanagot si Gloria. Pero hindi seryoso si Noynoy sa pagpaparusa kay Gloria. Iba ang gusto niya sa pag-impeach kay Corona. Dalawang oras lang ang kinailangan para magsampa ng kaso laban kay Gloria. Pero si Noynoy, inabot ng mahigit 500 araw mula nang maupo sa pwesto! Ang ikinaso pa, pagsabotahe sa eleksyong 2007 – hindi 2004! Napakahina! Bentang-benta rin kay Noynoy ang drama ni Gloria na maysakit. Kaya may special treatment kay Gloria!

Eh ano ang interes ni Noynoy sa pag-impeach kay Corona? Una, Hacienda Luisita. Gusto ni Noynoy na paatrasin ang desisyon ng Korte Suprema na nag-uutos ng pamamahagi ng Luisita sa mga magsasaka. O kaya naman ay palakihin ang kikitain ng pamilya niya kapalit ng lupa. Ikalawa, panlihis ng atensyon. Tumitindi ang kahirapan at kagutuman sa bansa. Nagpapaka-inutil si Noynoy dahil nakikinabang ang boss niyang Kano, mga kapitalista at asyendero. Mukha lang inutil, pero ang totoo’y kasabwat.

Ikatlo, kumpletong kapangyarihan. Gusto ni Noynoy na kontrolin nang todo ang Korte Suprema. Hawak na niya ang Kongreso at Senado. Kapag nahawakan pa niya sa leeg ang Korte Suprema, kakayanin niyang ipatupad kahit ang mga patakarang hindi gusto ng marami. Sa madaling salita, gusto niyang maging katulad ni Gloria noong si Gloria pa ang presidente: makapangyarihan, pwedeng gamitin ang kapangyarihan laban sa bayan.

Kahit totoong hadlang si Corona, hindi siya ang mapagpasya sa pagpaparusa kay Gloria. Ang mapagpasya pa rin ay ang pagpupursige ng gobyerno ni Noynoy. Hindi tama ang buung-buong pagsisi ni Noynoy kay Corona. Ang totoo, ang gusto ni Noynoy, utay-utay at unti-unti ang pagtugis kay Gloria. Siya ang dahilan kung bakit nagtagal ang pagsasampa ng kaso laban kay Gloria, at kung bakit mahihina ang kasong isinasampa.

Huwag nating hayaang magtagumpay si Noynoy sa maiitim niyang balak na gusto niyang ilusot sa pag-impeach kay Corona. Itulak natin ang kagyat na pamamahagi ng lupa ng Hacienda Luisita sa mga magsasaka. Kahit sa gitna ng impeachment, ipaglaban natin ang ating mga panawagan: Kontrolin ang presyo ng langis. Itigil ang demolisyon. Makabuluhang dagdag-sahod. Ibasura ang kontraktwalisasyon. Itigil ang panunupil sa lumalabang mamamayan. Tutulan natin ang pagkontrol ni Noynoy sa Korte Suprema.

Panagutin si Gloria! Tanggalin si Corona!
Noynoy, kontra-mamamayan, labanan!
Tutulan ang pagkontrol ni Noynoy sa Korte Suprema!
Noynoy at Gloria, walang pinag-iba!
Lupa, sahod, trabaho at karapatan – ipaglaban!
Kontrolin ang presyo ng langis! Itigil ang demolisyon!

Kilusang Mayo Uno
16 Enero 2012