Workers mark end of Congress sessions with firm resolve to push for passage of P125 bill

"STATUS QUO ORDER" NI P'NOY
SA PAL, TAGUMPAY AT SABOTAHE?

Tampok sa ngayon ang mga nakakabahalang desisyon ng mga Hukuman sa bansa.

Una,idiniklara ng Korte Suprema ang pagiging labag sa konstitusyon ng binuong "Truth Commission" ni P'Noy. Bago pa dito, umani na ng napakaraming batikos ang kredibilidad, legalidad at pagiging epektibo ng komisyong ito, kung seryoso ang Pamahalaan ni P'Noy na habulin at parusahan ang nakaraang Rehimeng Arroyo sa mga katiwalian at kasalanan nito sa taumbayan, ngunit pinagiitan pa rin ito ni P'Noy. Marami ang nagtatanong, idinisenyo ba ito para pumalya at mabigo? Ang desisyong ito ay dagdag na katotohanan sa napabalitang, pre-election "compromise agreement" sa pagitan ng pamilya Aquino, rehimeng Arroyo, at kinatawan ng Imperyalistang US.

Ikalawa, iniutos rin mismo ng Korte Suprema at Sandigang Bayan na isauli ang mga sequestered na ari-arian ng mga Marcos, kabilang ang 25 ektaryang lupain sa Canlubang, Laguna at 17 room mansion sa Tolosa, Leyte. Ngunit bago ito, pinigilan din ang pagbebenta ng PCCG sa mga alahas ni Imelda na nagkakahalaga ng higit sa $380 milyong dolyar.

Sa mundo ng showbiz, abswelto rin si Hayden Kho sa ginawa nitong pambababoy kay Katrina Halili na mariing kinukundena ng mga samahan ng mga kababaihan. At halos kasabay nito, matapos ang halos dalawampung taon, pinawalang-sala ng mismong Korte-Suprema ang mga nahatulang gang ni Hubert Webb sa Visconde Massacre, na may kaakibat na kautusan ng agarang pagpapalaya at di na muling maisasakdal dahil sa prinsipyo ng double jeopardy.

Sa kabilang mukha ng Hustisya, sa kabila ng depektibong warrant of arrest, gawa-gawang akusasyon at mga itinanim na ebisdensya, patuloy pa sanang naninindigan si P'Noy na ipaubaya na lang sa Korte ang kaso ng Morong 43. Ngunit sa tindi ng batikos na inabot nito sa taumbayan at buong mundo, napwersa si P'Noy na iatras nang tuluyan ang kasong isinampa sa Morong 43.

MAKA-URING HUSTISYA(CLASS JUSTICE)?

Bagama't nasa isang "quasi judicial body" pa lamang ang kaso ng mga manggagawa sa PAL, maari nang pagbatayan ang dalawang mukha ng Hustisya sa bansa. Ang hustisya para sa mayayaman at makapangyarihan, at ang hustisya para sa mga api at anakpawis.

Nalalantad ang maka-uring pagkiling ng puro satsat na Rehimen ni P'Noy sa gusot sa Philippine Airlines. Ang banta ng "Open Skies Policy", ang ipinataw na Assumption of Jurisdiction, at ang desisyon ni Sec. Baldoz, ay ang mga hakbang at patakaran ng rehimen ni P'Noy na naglalantad ng maka-uring pagkiling nito sa despotiko at ganid sa tubo na si Lucio Tan. Sinasalamin din ng mga hakbang at desisyong ito ang pananaw at pagtrato ng rehimeng ito sa mga manggagawang lumilikha ng yaman ng bansa.

Tulad sa kaso ng Morong 43, na napwersa
ang rehimen ni P'Noy dahilan sa sama-sama at malawak na pagkilos at pagbatikos ng mga mamamayan at buong mundo. Ang kaso ng Hacienda Luisita na pinagbuwisan pa ng buhay ng mga aping magsasaka, kaya napwersa ang rehimeng Arroyo na magbaba ng kautusan na ipamahagi ang lupa ngunit patuloy na binabarahan ng pamilya Aquino-Cojuangco
lalo na ng rehimen ni P'Noy.

Ang "status quo order" ni P'Noy ay bunga ng lumalawak na suporta sa bantang welga ng mga manggagawa ng PAL, at ang polarisasyon sa Kilusang Manggagawa laban sa kontraktwalisyon, pagbawi ng job security ng mga manggagawa, at ang paglabag sa karapatang mag-unyon. Nangangamba ang sabwatang P'Noy-Lucio Tan na mawala ang opurtunidad ng pagkamal ng tubo sa kasagsagan ng byahe ng mga mamamayan ngayong kapaskuhan, dahilan sa banta ng militanteng pagkilos at welga ng mga manggagawa ng PAL, kaya napwersa si P'Noy na maglabas ng kautusan.

Maaring ituring na inisyal na tagumpay ang kautusan na "status quo" ni P'Noy.
Sa kabilang banda, maaring ituring din itong sabotahe, dahilan ang kautusang ito ay malamig na tubig na ibinuhos sa kumukulong pagnanais ng mga manggagawa na ilunsad ang militanteng welga. Sinabotahe rin ng kautusang ito ang tiyempo at tama sa panahong pagputok ng welga, na magtitiyak ng malaking posibilidad ng tagumpay.

Walang malinaw sa kautusan ni P'Noy, kung di layunin lang nitong pigilan ang
bantang welga ng mga manggagawa sa PAL.
Nguni't, walang layunin na pigilan nito ang malawakang tanggalan at ang pagpapatupad ng kontraktwalisasyon. Ang "status quo order" ni P'Noy ay pailalim na pag-suporta sa ganid na si Lucio Tan sa anyo ng katuwirang "Public & National Interest" ng bansa, at pananabotahe sa pakikibaka ng mga manggagawa sa PAL.

Para sa mga manggagawa ng PAL, hindi dapat kalimutan na pansamantala ang pag-atras ng sabwatang P'Noy-Lucio Tan. Nagawa ito dahilan sa sama-sama at militanteng pagkilos at banta ng welga at malawak na suporta ng Kilusang Manggagawa. Tuluyang mapapaatras ito kung patuloy na aasa sa sariling lakas at militanteng pagkilos para maging ganap ang tagumpay.

Dapat ding panghawakan, ang labang ito ay magtatakda o iimpluwensya sa tunguhin at hinaharap ng pakikibaka ng mga manggagawa laban sa kontraktwalisasyon, pagbawi ng job security, at ang karapatang mag-unyon, dahil ang direktang kaharap dito ay isang rehimen na lantarang kumakandili sa isang despotiko at ganid na Kapitalistang Komprador na si Lucio Tan. Kailangan natin itong ipagtagumpay!!!

ILANTAD ANG MAPANLINLANG AT MAKAISANG PANIG NA STATUS QUO ORDER NI P'NOY!!!

PANGHAWAKAN ANG SAMA-SAMA AT MILITANTENG PAGKILOS PARA MAGTAGUMPAY!!!