Contrary to promise of big firms, BPO expansion means destruction of livelihoods – KMU

SI P'NOY, ANG PENOY AT ANG ABNOY ?

Ang Penoy at ang Abnoy ay isang popular na kakanin ng masa at tatak ng Bayan ng Pateros. Ang Penoy ay ang itlog na naudlot na maging sisiw, ang Abnoy ay ang nabugok na itlog, at ang Pateros ang nag-iisang bayan sa Metro-Manila na pinagkaitan ng pag-usad ng kaunlaran.

Ang Pamahalaan ni P'NOY ay isang Penoy na naudlot na maging sisiw. Ito ay isang Abnoy, dahilan sa mga bugok na patakaran nito para sa mamamayan. Inilalalagay nito ang buong bansa sa mistulang Bayan ng Pateros dahilan sa mga sisiw at bugok na patakaran nito. Ang mga nakaraang rehimen mula kay Quezon ay mga nabuong sisiw na takot na dagitin ng Agila, ang Imperylalistang Estados Unidos. Ang rehimen ni P'Noy ay mas mapanganib dahilan sa ito ay hindi nabuong sisiw(Penoy) at may bugok na kaisipan(Abnoy), na walang kakayahang tumutol sa dikta ng isang Imperyalistang Agila.

Mula sa isandaang araw nito, nalantad kaagad ang mga sisiw at bugok na patakaran nito at ang kawalang malasakit nito sa batayang masa ng sambyanan, ang mga magsasaka, manggagawa, kabataang estudyante, at iba pang sektor na pumapasan ng papatinding krisis sa kabuhayan.

Walang kahihiyan at mistulang hindi alam, nang sabihin nitong malaki ang matutuhan at maitutulong ng bansang Vietnam sa paglaki at pag-unlad ng produksyon ng pagkain sa ating bansa. Bilang pangunahing kinatawan ng Haciendero Komprador, alam n'yang ang monopolyo sa lupa ang ugat ng pagbaba ng produksyon sa pagkain na batayang suliranin ng sambayanan. Alam n'yang ang pagwasak sa monopolyo sa lupa at pagpapatupad ng Tunay na Reporma sa Lupa ang tanging kalutasan sa pagdurusa at kahirapan ng masang magsasaka at buong sambayanan. Ang bansang Vietnam na tinuruan nating magtanim ng palay sa IRRI(International Rice Research Institute), tayo pa ngayon ang isa sa pinakamalaking nilang kustomer na taga-angkat ng bigas.

Ang Public-Private Partnership(PPP), na una nang inilako sa Estados Unidos ay inilalako rin nito ngayon sa bansang Vietnam at sa mga susunod pang bansang bibisitahin nito. Ibig sabihin, taliwas sa mga satsat nitong kaunlaran, ikinakasa na nitong isuko sa mga pribado at dayuhang korporasyon ang mga natitira pang mga pangunahing industriya na pag-aari ng pamahalaan, mula sa pananalapi, transportasyon, komunikasyon, pagawaing bayan(public works), public health(hospital) at maging sa sektor ng edukasyon.

Ikinakasa na rin nito ang pagbabago sa Saligang Batas at Labor Code ng Pilipinas, para sa isandaang porsyentong(100%) pag-aari ng mga dayuhan sa ating mga lupain sa agrikultura at minahan, at ang reporma sa Labor Code na lalong maglelegalisa sa mababang pasahod(cheap labor policy), contractualization, job outsourcing o job contracting, at iba pang kontra-manggagawang patakaran na sumusupil sa karapatang mag-unyon at mag-welga ng mga manggagawa.

Kung hindi masasawata o mapipigilan, isang mapanganib at marahas na rehimen ang Pamahalaan ni P'NOY dahilan sa mga sisiw at bugok na patakaran nito. Kailangan natin ang alistong hakbang at pagkilos sa bawat patakran na ipinatutpad nito. Kailangan nating pagkaisahin, mobilisahin at pakilusin ang milyon-milyong mamamayan para ilantad at labanan ang mga patakarang ito, na tuluyang wawasak sa kabuhayan ng mamamayan.

Mahalagang maisalin sa mga kongkretong aksyon ang pagkakaisa ng sambayanan, mula sa maliliit tungo sa malalaki. Mula sa mga petisyon, piket-rali at demonstrasyon, tungo sa papalaking demonstrasyon, welga at koordinadong welga tungo sa pangkalahatang welga ng sambayanan.