Lider-unyon na pinaslang sa Cavite, ika-74 sa ilalim ng gobyernong Arroyo

Mariing kinondena ng militanteng unyong Kilusang Mayo Uno (KMU) ang pagkapaslang ngayong araw kay Jesus Beth Servida, lider-unyon ng Emi Yazaki factory, isang araw matapos ang pagdiriwang ng Pandaigdigang Araw ng Karapatang Pantao.

Ayon sa ulat, binaril at napaslang si Servida sa harap mismo ng gate 2 ng Emi Yazaki factory banding 6:30 ng umaga. Nagtamo naman ng tama ang isa nitong kasama. Patungo sa trabaho ang biktima nang maganap ang insidente.

Ayon kay Joel Maglunsod, Pangkalahatang-Kalihim ng KMU, “Si Servida ay ika-74 na biktima ng pamamaslang sa hanay ng kilusang paggawa sa ilalim ng rehimeng Arroyo. Matatandan natin na nuong Abril 28, 2006, inambus at pinagbabaril nila SPO1 Romeo Lara at Larry Reyes si Gerardo “Jerry” Cristobal, dating presidente ng unyon ng EMI-Yazaki, kung saan ito malubhang nasugatan. Bilang pagtatangol sa sarili, nanlaban si Jerry at napatay niya si SPO1 Lara at nasugatan naman si Larry Reyes.”

Nuong nakaraang buwan lamang ay isang lider-manggagawa din ang pinaslang sa Timog-Katagalugan. Napatay nuong Nobyembre 21, 2006 si Andrew Iñoza, presidente ng unyong ng Alaska Corporation. Papasok din sa trabaho si Iñoza tulad ni Servida.

“Malinaw na tuloy-tuloy pa rin ang patakaran ng rehimen ni Arroyo na paslangin ang mga lider-manggagawa at mga aktibista kahit kaliwa’t kanan ang batikos ng iba’t ibang sektor dito sa ating bayan at maging sa ibayong dagat,” dagdag ni Maglunsod. Ayon kay Maglunsod, maging si Japanese Foreign Minister Taro Aso ay nagpaabot kay Arroyo ng babala na hindi makakakuha dagdag na ayuda kung hindi gaganda ang sitwasyon ng karapatang-pantao sa Pilipinas.

Binanggit ni Maglunsod na isa ito sa mga isyu na nagtutulak sa mga obrero na ubos-kayang labanan ang Charter Change ni Arroyo. “Sa planong Charter Change ni Arroyo nais niyang manatili sa poder ng kapangyarihan hanggang magpakailanman sa pamamagitan ng paglilipat ng sistema ng gobyerno patungong parliyamentaryo at aalisin nila ang term limits. Hangga’t nasa poder ang pasistang si Arroyo, magpapatuloy ang pagpaslang sa mga aktibista at lider-manggagawa,”

Ipinaabot din ng lider-obrero ang pakikiramay sa naulila ni Servida.