Sa pag-init ng ulo sa maralita: Noli, dapat mag-sorry

Hindi magandang tingnan: ipinakita na sa wakas ni VP Noli de Castro na boses siya kontra-maralita. Sinakyan niya ang pagiging popular na TV anchor noon para magpakilalang “boses ng bayan.” Noong maupo siyang bise-presidente, naging boses siya ng rehimeng Arroyo. Ngayon, ito. Mukhang nahawaan na siya ng pagtatrabaho sa kontra-maralitang rehimen, kasama ang mga katulad nina Bayani Fernando na hari ng demolisyon. Winawasak niya ang natitirang tsansa niya sa darating na halalan.

Maraming naghihinalang uminit ang ulo niya dahil kinulit siya ng mga kaibigan sa midya tungkol sa plano niya sa halalang 2010. Una, hindi siya dapat magalit sa atensyon ng midya. Dapat nga, may plano na siya ngayon. Hindi magandang katangian ng isang pangulo ang kawalang-tindig. Pangalawa, bakit naman ang maralita ang napagdiskitahan niya? Porke ba hindi mukhang kasing-makapangyarihan ng midya ang mga maralita, hindi na nila matatandaan ang mga tirada ni Noli at hindi na sila mahalaga sa mga eleksyon?

Pangatlo, sobrang bastos ito. Bakit siya nagbanta ng pagpapalayas sa mga maralita? Ipinapakita lang nito kung gaano ka-insensitibo si Kabayan sa lagay ng mahihirap nating kababayan. Matapos lumikas papunta sa mga lungsod para maghanap ng trabaho at matapos hindi makakita, lagi nang nahaharap sa mga banta ng demolisyon ang mga kababayan nating maralitang tagalungsod. Sobra na para sa kanila ang marinig pa ang ganitong banta mula sa bise-presidente ng bansa. Hindi ito malilimutan ng mga manggagawa at maralitang tagalungsod.  ###