US troops, panganib sa kapayapaan at kabuhayan – KMU

Sasahol ang lagay ng kapayapaan at kabuhayan sa bansa dahil sa walang taning na pananatili ng mga tropang US, sabi ng anti-imperyalistang Kilusang Mayo Uno. Sabi nito, dahil hindi sila saklaw ng batas at ipinagtanggol pa ng Malakanyang ang desisyon ng Pentagon, lalo silang naging walang pananagutan sa batas.

Sinabi rin ng sentrong unyon na lalo namang nagiging bulnerable ang mga Pinoy sa karahasan ng militar at sa paglabag sa karapatang pantao.

“Ipinapakita ng rekord ng militar ng US, lalo na sa mga bansang Third World, na sinanay itong umabuso at lumabag sa karapatang pantao, bukod pa sa paglulunsad ng lihim na mga operasyong militar,” sabi ni Elmer “Bong” Labog, tagapangulo ng KMU.

“Andami nang paglabag sa karapatang pantao tuwing may Balikatan. Gusto pa ba nating madagdagan ito?” sabi ni Labog.

Bukod sa mga abusong naiulat, binanggit niya ang kaso ni Rafaela Polborido, isang taon at apat na buwang gulang, na namatay noong binomba ng 901st Brigade ng militar ang dalawang bahay sa Barangay Balanac, Ligao City, Albay noong Pebrero 18 – sa clearing operations nito para sa Balikatan. Anim na batang may edad 10 buwan hanggang siyam na taon, at tatlong babae, ang malubhang nasugatan.

“Siguradong hindi titigil ang ganyang mga hakbanging terorista habang narito ang mga tropang US,” sabi ni Labog.
Sa Bicol, sa paghahanda ng militar sa Balikatan, libu-libong pamilya ang napalayas, natakot ang mga magsasaka at mangingisda na magtrabaho, nagpataw ng curfew ang militar at binalaan nito ang mga mamamayan na huwag sumama sa mga protesta. 
 
Paliwanag ni Labog, gustung-gusto ng US na isulong ang mga interes nito sa pulitika at ekonomiya ngayon, dahil sa matinding krisis.

“Tandaan nating laging kasama ang pagpapalakas sa militar at panggegera sa mga tugon ng US sa krisis. Patunay rito ang dalawang digmaang pandaigdig,” sabi niya.

Babala ng KMU, bahagi ng maluhong paggastos sa militar ng US ang mas pinaigting na operasyon ng mga tropa nito sa Gitnang Silangan at Hilagang Korea.

“Ito ang dahilan kung bakit ganito ang US, nagdedeklara ng patakaran sa ibang bansa kasabwat ang mga papet nilang rehimen,” dagdag ni Labog. #